Ақтөбеде жасыл желекті суарудың жаңа әдісі жүзеге асуда

Ақтөбеде жасыл желекті суарудың жаңа әдісі жүзеге асуда
19.06.2019 Жалпы

Облыс әкімі Оңдасын Оразалин сәрсенбі, 19- маусым күні   жоспардан тыс Ақтөбе қаласында  атқарылып жатқан  бірнеше жұмыстармен танысты.  

Облыс басшысы  алдымен Бөкенбай батыр көшесіндегі  ағаштарды және көгалдарды суару  жұмыстары бойынша жүзеге асырылған жаңа жобаны көрді.  Суару  жұмысын қолға алған  «КХ Эльмира» мердігер мекемесі  Индонезия елінен жеткізілген жаңа  технология  арқылы  ағаштар мен гүлзарларды  тамшылатып суару әдісіне көшкен.

Мамандар  Ақтөбе қаласы бойынша  алғаш рет жүзеге асып отырған бұл әдістің артықшылығы  көп екенін айтады 70 метр тереңдікке орнатылған насос автоматты  түрде ағаштар мен көгалды шөптерді , уақытылы әрі бірқалыпта  сумен қамтиды. Су тасығыш көліктермен суарғаннан  гөрі, осы тәсіл арқылы тамшылатып суару  тиімдірек дейді мамандар.  Техника күніне  100  текше  метр су шығаруға қуатты. Ақтөбеде алдағы уақытта ағаш суару мен көгалды ылғалдандыру бойынша 8 жобаны  жүзеге асыру жоспарланып отыр. Аймақ басшысы, жаңа тәсіл үнемді әрі пайдалы болса, әрі қарай да жұмысты жандандыру қажеттігін айтты.

«Ағаштарды еккенмен оларды уақытылы  күтіп-баптауды ұмыт қалдырып жатсыздар.  Бұл бір жағынан  үлкен шығынға ұшыратса, екінші жағынан тұрғындардың наразылығын тудырады. Сондықтан суару  әдісі осылай  шешімін тауып жатса, бұл жұмыс жалғасын табу қажет»,-деді облыс басшысы.

Сонымен қатар,Оңдасын Оразалин  Сазды өзені арнасын  кеңейту және бекіту  жұмыстарымен танысты. Өңір басшысы   қала әкіміне жұмысты сапалы әрі уақытылы жүргізуді тапсырды.